8-anyos ginahasa, pinatay sa sakal
CANDELARIA, Quezon, Philippines – Patay na nang matagpuan ang isang 8-anyos na babaeng estudyante na hinihinalang ginahasa pa saka itinapon ang bangkay nito ng isang umano’y adik sa masukal na bahagi ng isang subdibisyon sa Brgy. Masin Sur ng bayang ito, kamakalawa ng hapon.
Kinilala ng pulisya ang biktima na si Janelle Nivera Sanchez, Grade 3 pupil ng Highway View, Brgy. Masin Sur, Candelaria, Quezon.
Batay sa ulat, huling nakitang buhay ang biktima noong Enero 5, 2020 ng hapon habang naglalaro sa labas ng kanilang bahay kasama ang kapwa mga bata. Subalit lumipas na ang magdamag ay hindi na nakauwi ang biktima hanggang sa iulat sa himpilan ng pulisya ng ama nitong si Ronaldo ang pagkawala ng anak.
Sa isinagawag search operation ng pamilya at mga awtoridad sa pamumuno ni P/SMS Maripil Real, natunton ang wala nang buhay na bata na nakasubsob sa damuhan, walang saplot pang-ibaba, duguan ang ari at punit-punit ang damit na palatandaang ginahasa sa kagubatang bahagi ng West Valley Subdivision sa Brgy. Masin Sur.
Sa follow-up operation, nasakote ang pangunahing suspek sa krimen na si Ricardo Bongalon Burce, 55-anyos, may asawa, obrero, tubong Tabaco City, Albay at nakatira sa nasabi ring barangay.
Si Burce ang huling nakitang kausap ng biktima habang naglalaro. Nakita rin umanong may bakas ng dugo ang damit ng suspek na nanggaling sa kakahuyan kung saan nadiskubre ang bangkay ng bata.
Sa ulat, una pang nagkuwento ang suspek na nakita nga niya ang biktima na naglalaro pero tinangay umano ng tatlong lalaki at isinakay sa isang van.
Sa kabila nito, hindi kinagat ng pulisya ang alibi nito hanggang sa umamin na napatay niya ang bata sa sakal nang manlaban at magpumiglas habang kanyang ginagahasa.
Ang suspek na rin umano ang nagturo sa bangkay ng bata matapos ang kanyang pag-amin sa krimen.
- Latest
