Mag-asawa dedo sa hit & run
NORTH COTABATO, Philippines — Patay ang mag-asawa sa unang araw ng taon habang masuwerteng nakaligtas ang 6-anyos nilang anak matapos na masalpok ang sinasakyan nilang motorsiklo at takbuhan ng nakabundol sa Patulangon Road, Barangay Malasila, Makilala, lalawigang ito noong Miyerkules ng gabi.
Kinilala ang mga biktima na sina Rogen Bayod Fernandez, 26 anyos, mekaniko at ang backrider na misis na si Stephanie, 28, kapwa residente ng Palmera Drive, Barangay Poblacion. Nakaligtas naman ang batang anak na kasama ring sakay sa motorsiklo sa nasabing insidente, pasado alas-7:00 ng gabi.
Sa report ng Makilala Police, papuntang Kidapawan City ang mga biktima pero pagdating sa naturang lugar ay bigla na lang silang binangga sa likuran ng isa pang motorsiklo. Dahil sa insidente, tumilapon ang driver ng motorsiklo sa gilid ng highway at nagtamo ng sugat dahilan para bawian ng buhay pati na rin ang angkas na misis.
Himala namang nakaligtas ang kanilang paslit na anak. Imbes namang tumigil, iniwan ng ‘di nakilalang driver ang mga biktima na nakahandusay sa kalsada.
- Latest
