4 pa tigok sa ‘killer lambanog’
CAMP NAKAR, Lucena City, Philippines — Isang mag-asawa at dalawang iba pa ang nadagdag sa talaan ng mga namatay makaraang uminom ng nakalalasong lambanog habang idinaraos ang araw ng Pasko.
Ayon sa ulat na tinanggap ni Quezon Police Director P/Col. Audie Madrideo, nakilala ang mag-asawang namatay na sina Pedro, 59, at Rosie Duran, mga residente ng Pagbilao, Quezon.
Nag-inuman umano ang mag-asawa ng lambanog noong araw ng Pasko at makaraan ay nakaranas ng pananakit ng tiyan, panlalabo ng mata at pagkahilo hanggang sa isugod sa Quezon Medical Center (CMC) sa Lucena City at kinalaunan ay namatay.
Tumanggap naman ng tawag sa telepono si P/Lt. Col Romulo Albacea tungkol sa dalawang lalaking dinala pa sa ospital na diumano’y uminom ng lambanog.
Sa beripikasyon, nabatid na uminom ng lambanog mula sa maliit na tindahan na binili naman sa Laguna ng mga biktimang sina Alvin Santiago Gonzales, 34, at Dominic Colegio, 29.
Nakaranas ng sintomas ng pagkalason ang dalawa at isinugod sa QMC na kinalaunan ay nalagutan ng hininga.
Umabot na sa 7 katao mula sa lalawigan ng Quezon ang namatay dahil sa pag-inom ng killer lambanog.
Nauna nang naiulat ang pagkamatay ng tatlo katao sa Candelaria, Quezon na kinilalang sina Christian Duarte Aguilar, 25-anyos, tricycle driver; kaanak na si Ernesto Aguilar, 54, at Marvin Macatangay, 28.
Dahil sa apat na hu-ling nadagdag na nasawi, umaabot na sa 19 katao ang namamatay sa lambanog sanhi ng sinasabing methanol content nito.
- Latest
