2 farm caretaker timbog sa droga

LUCENA CITY, Philippines — Sa kulungan magdaraos ng pagsalubong sa Bagong Taon ang maglive-in na caretaker ng farm ng mga sasabunging manok matapos silang makuhaan ng mahigit sa P.2 milyong halaga ng hinihinalang shabu sa isinagawang anti-drug operation ng pulisya sa Purok Ilang-ilang 29, Barangay Silangang Mayao, dito sa lungsod kahapon.

Kinilala ni P/Lt. Col. Romulo Albacea, chief of police dito, ang mga nadakip na sina Orlando Barientos, 48, at Marites Evangelista, 43. 

Isinagawa ng mga operatiba ng City Drug Enforcement Unit (CDEU) ang buy-bust operation sa mga suspek dakong alas-2:00 ng hapon sa compound ng binabantayan nilang farm.

Nakuha mula sa pag-iingat ni Orlando ang isang plastic sachet ng shabu at isang kalibre 38 revolver na may kasamang tatlong bala.

Isang kaha ng sigarilyo na naglalaman ng 9 na plastic sachet ng shabu na tinatayang nagkakahalaga ng P225,000, isang P1,000 bill at dalawang budol na P1,000 ang nakuha mula kay Maritess.