State of emergency sa ‘killer lambanog’ 10 na pataysa Rizal, Laguna
MANILA, Philippines — Isinailalim sa “state of emergency” ang bayan ng Rizal sa Laguna matapos umabot na sa 10 katao ang nasawi habang nasa 300 katao pa ang nakaratay sa iba’t ibang pagamutan dahil sa pag-inom ng nakalalasong lambanog.
Ayon kay Rizal, Laguna Mayor Vener Muñoz na nagdeklara ang kanilang pamahalaan ng state of emergency upang mabigyan ng pinansyal na tulong ang mga nakaratay pang pasyente.
Nabatid na ang mga nabiktima ng “killer lambanog” ay galing sa iba’t ibang party na bumili lamang ng lambanog sa iisang tindahan sa Quezon.
Iniutos na ni Calabarzon (Cavite, Laguna, Batangas, Rizal, Quezon) Director P/Brig. Gen.Vicente Danao sa mga police provincial commanders at mga chief of police na makipagkoordinasyon sa Food and Drugs Administration (FDA) at lokal na pamahalaan upang ipagbawal muna ang pagbebenta ng lambanog.
“If there are still people selling, they will be warned, if not their lambanog stocks will be confiscated,” dagdag ni Danao.
Sinabi ni Danao na ang lambanog na kumitil ng buhay ng 10 residente ng Rizal, Laguna ay binili nila sa Quezon.
“Ang balita namin, dun sa gumagawa, may nahalo sila na ‘di dapat. But that is still subject for further verification. Sa mga nakabili na, we advise them na huwag na inumin, kundi itapon,” dagdag ni Danao.
Kabilang sa mga nasawi ay sina Analyn Lanuza, Fiedra Cenon, Maricriz Lanuza, Jason Navarozza, Elmer Dorado, Ricky Vitangcol, Marlon Veridiano, Luis Urriquia, Rizalino Monserat at Benedicto Mendoza; pawang sa Rizal, Laguna.
Samantala, sa Candelaria, Quezon, namatay rin sina Ernesto Aguilar, 54 at Marvin Macatangay dahil sa pag-inom umano ng lambanog habang nasa kritikal na kondisyon sa United Candelaria District Hospital sina Fernando Aguilar, 53 at Christian Aguilar, 25. Lumalabas sa mga pagsusuri na nasawi at naratay ang mga biktima sa methanol poisoning.
- Latest
