Umpisa ng Simbang Gabi: 2 mekaniko niratrat
TUGUEGARAO CITY, Cagayan, Philippines — Madugo ang umpisa ng pagdaraos ng Simbang Gabi nang dalawang mekaniko ang kritikal matapos pagbabarilin ng riding-in-tandem sa loob ng sinasakyang van habang patungong simbahan sa Brgy. Na-raragan, Ballesteros, Cagayan kahapon.
Kinilala ni P/Master Sgt. Eduardo Serrano Jr. ang mga biktima na sina Orlando Diamsay, 26, at Jenifer Acoba, 36, kapwa residente ng Brgy. San Juan ng nasabing bayan.
Sa report, sinasabing magsisimba sana galing sa isang laklakan sa beerhouse ang dalawang mekaniko nang unahan sila at paputukan ng mga pinaniniwalaang bayarang berdugo sa abandonadong bahagi ng highway dakong alas-2:30 ng madaling araw.
Kapwa isinugod ng mga sumaklolo sa Far North General Hospital sa karatig bayan ng Luna, Apayao ang dalawa kung saan sila nakikipagbuno kay kamatayan.
Apat na basyo ng bala ng cal. 45 ang narekober ng mga imbestigador sa crime scene.
- Latest