Trike driver dedo, 2 malubha sa road crash

TUGUEGARAO CITY, Cagayan, Philippines — Utas ang isang drayber ng tricycle habang malubha ang isang yaya at alaga nitong isang taong gulang sa magkahiwalay na insidente ng salpukan sa highway sa Alicia, Isabela at Abulug, Cagayan kamakalawa.

Sa report ng pulisya, nagkasalubong ang traysikel ni Frederick Returco, 42 at kotseng Mitsubishi Lancer ni Jose Prudencio, 30 sa gitna ng kalsada sa Brgy. San Fernando, Alicia dakong alas-8:30 ng gabi.

Kapwa nagtamo ng pinsala sa katawan ang dalawang drayber na isinugod sa pribadong ospital subalit hindi na nakarating nang buhay si Returco.

Sa bayan ng Abulug, agad tumawid matapos bumaba mula sa sinakyang jeepney si Reylinda Pagudpud karga ang paslit na si Maria Priscanne Bancud nang tumbukin sila ng kotse ni Moses Ingan, 35, na isang negosyante mula Sinait, Ilocos Sur.

Tumilapon sa ere at nagpagulung-gulong sa kalsada si Pagudpud at alaga nito na isinugod ng mga sumaklolo sa ospital. Sumuko naman si Ingan sa himpilan ng Police Mobile Force Company sa karatig bayan ng Pamplona.