Klase sa Albay, Sorsogon sa Lunes at Martes, sinuspinde
Bilang paghahanda kay ‘Tisoy’
LEGAZPI CITY, Albay, Philippines — Dahil sa pangambang pagtama ng bagyong Tisoy sa Bicol, pareho nang nagdeklara ng kanya-kanyang suspension of classes sa darating na araw ng Lunes at Martes ang mga gobernador ng lalawigan ng Albay at Sorsogon kahapon.
Halos magkasunod na nagpalabas ng executive order para sa suspension si Gov. Chiz Escudero ng Sorsogon at Gov. Al Francis Bichara ng Albay sa lahat ng level matapos isagawa ang magkahiwalay na pulong sa Provincial Disaster Risk Reduction Management Council (PDRRMC) hinggil sa pangambang pagtama ng bagyong Tisoy.
Ayon kay Gov. Escudero kailangan nilang magsuspinde ng pasok sa lahat ng level upang makapaghanda ang lahat at walang mapahamak.
Si Bichara naman ay ipinalabas ang desisyon sa pamamagitan ni Albay Provincial Safety and Emergency Management Office (APSEMO) chief Dr. Cedric Daep matapos pulungin kahapon ng hapon ang mga kasapi ng PDRRMC.
Sa nasabing pulong inalerto at pinaghahanda ni Daep ang lahat ng mga disaster response unit ng mga bayan at lunsod sa buong Albay sa “worst case scenario” sa pagpasok ni Tisoy lalo na ang pagragasa ng lahar sa palibot ng bulkang Mayon, pagkakaroon ng baha, flashflood at landslide lalo na sa mga bayan ng Tiwi, Manito at ilan pang mga lugar.
- Latest
