Granada sumabog sa iskul: Pulis, amok patay
MANILA, Philippines — Isang pulis ang nasawi nang masabugan ng granadang inihagis ng isang lalaking nag-amok na napatay naman ng mga otoridad habang 17 katao na karamihan ay mga estudyante sa isang kolehiyo ang sugatan sa Initao, Misamis Oriental kahapon ng tanghali.
Kinilala ang mga nasawi na si Police Master Sergeant Jason Magno, nasapul sa pagsabog ng granada, at ang suspek na nakilalang si Ebrahim Ampaso Basher, 65-anyos, ng Madamba, Lanao del Sur, na nabaril naman ng mga nagrespondeng operatiba ng pulisya.
Ang mga nasugatan ay kinabibilangan ni Police Master Sergeant Alice Balido; mga estudyanteng sina Jasper Abcede; Jolly Tacbobo; Lino Talgac; Alan Ragmac Bahian; Neri Initao; Rey Galarosa; Hermori Poblete; Jomar Magla-ngit; Acmad Mangugadatu; Jundi Bagares; Sito Bagares; Raine Heart Payusan; Acmad Ponadatu, at Jesile Bulaybulay 14; Nestor Oblimar, professor; Ann Panorili, kawani sa DENR.
Sa inisyal na imbestigasyon, nangyari ang pagsabog dakong alas-11:20 ng tanghali matapos na mag-amok ang isang lalaki na naghasik ng sindak sa Initao College na matatagpuan sa Brgy. Jampason, Initao ng lalawigang ito.
Sa pagresponde ng mga pulis ay dito na inabutan na tinatangka ni Magno na agawin ang granada mula sa nag-aamok na suspek kung saan ay inihagis ito at sumabog.
Nasapul sa pagsa-bog si Magno na siya nitong ikinamatay habang nasugatan naman ang 17 iba pa kabilang ang isang pulis.
Samantalang ang suspek ay nabaril naman ng mga kasamahang parak ni Magno na siya nitong ikinasawi.
- Latest
