Parak patay sa motor crash

LEGAZPI CITY, Albay, Philippines — Nagkalasug-lasog ang katawan ng isang bagitong pulis matapos bumangga sa concrete barrier sa tabi ng kalsada ang kanyang minamanehong motorsiklo sa kahabaan ng Rizal Street,Old Albay District sa lungsod na ito kamakalawa ng madaling araw.

Agad naisugod sa Albay Emergency Response Team sa Bicol Regional Training and Teaching Hospital ang biktimang si Patrolman John Patrick Cano, 23-anyos at residente ng Purok-1, Brgy. Kiwalo, Daraga pero ‘di na umabot nang buhay.

Sa ulat, dakong alas-4:00 ng madaling araw, sakay ng kanyang motorsiklo (6957-EZ) ang biktima at mabilis na binabagtas ang kalsada mula sa bayan ng Daraga patungong Albay District nang pagdating sa palikong bahagi ng kalsada ay nawalan siya ng kontrol sa manibela kaya napunta ang motorsiklo sa kabilang linya at sumampa sa gutter ng kalsada saka malakas na humataw sa concrete barrier. Sa lakas ng pagkakasalpok, duguang humandusay sa tabi ng kalsada at agad namatay ang biktima.