Manggagawa ng hacienda kinidnap ng 3 maskarado

NEGROS OCCIDENTAL, Philippines — Dinukot ng tatlong armadong kalalakihan na nakasuot ng maskara ang isang magsasaka sa Brgy. Tanza, EB Ma-galona, Negros Occidental kamakalawa ng gabi.

Kinilala ang biktima na si Roger Hellacone, 18-anyos, binata, manggagawa sa hacienda at residente sa Brgy. Sto Niño, EB Magalona ng lalawigang ito.

Sa ulat ng Negros Occidental Police, nangyari ang pagdukot sa biktima sa Purok Masagana, Brgy. Tanza ng bayang ito bandang alas-7:55 ng gabi.

Sa pahayag sa mga awtoridad ng kapatid ng biktima na si Lindy Hellacone, 24-anyos, bigla na lamang sumulpot sa kanilang lugar ang mga armadong lalaki na kapwa nakasuot ng maskara. Wala namang nagawa ang pamilya ng biktima upang saklolohan ang huli dahil mga armado ang mga suspek.

Agad na sinunggaban ng mga suspek ang biktima at puwersahang kinaladkad pasakay sa kulay abong pickup na hindi nakuha ang plaka saka tinangay sa hindi pa malamang destinasyon.