Van salpok sa bahay: Titser dedo, 4 sugatan
NORTH COTABATO, Philippines — Dead-on-arrival sa pa-gamutan ang isang guro habang sugatan ang apat na iba pa kabilang ang kanilang drayber matapos na bumangga ang sinasakyang pampasaherong van sa isang bahay pahingahan sa National Highway Barangay Dalingaoen sa bayan ng Pikit North Cotabato kamakalawa.
Kinilala ang nasawi na si Leonila Salang Fernandez, guro ng isang paaralan sa Cotabato City at residente ng Amhersia St., NovaTierra Village, Lanang, Davao City habang ang mga nasugatan na pasahero ay sina Juvil Hermosura ng Surallah South Cotabato; Czyrie Jade Cariaso ng Upi, Maguindanao at Kamesa Pananggilan ng Kabuntalan, Maguindanao.
Ayon kay P/Staff Sergeant Ibrahim Langaban Mandas, traffic investigator ng Pikit Police, alas-3:00 ng madaling araw habang binabagtas ng Toyota Hi Ace van na minamaneho ni Celso Geromo Gerago Jr. ang national highway galing Davao City at patungo sana sa Cotabato City nang pagsapit nila sa lugar ay iniwasan nito ang tumatawid na aso hanggang sa mawalan siya ng kontrol at bumangga sa isang bahay sa lugar.
Dahil sa lakas ng impact, patay ang gurong pasahero na papasok na sana ng kanilang paaralan habang nasugatan ang apat kabilang ang driver ng van.
- Latest