Magsasaka nirapido sa pinyahan, dedo
CAVITE, Philippines – Isang magsasaka na caretaker ng isang taniman ng pinya ang napaslang nang pagbabarilin ng ‘di pa natutukoy na salarin habang nagtatabas ng damo sa pinyahan sa Brgy. Buck Estate, Alfonso, sa lalawigang ito, kamakalawa ng hapon.
Ang nasawing biktima na nagtamo ng tama ng bala sa leeg at katawan ay kinilalang si Senando Hernandez, nasa hustong gulang.
Patuloy namang inaalam ang pagkakakilanlan ng suspek na agad tumakas matapos maisagawa ang pamamaslang.
Sa ulat ng pulisya, dakong alas-4:00 ng hapon nang maganap ang insidente. Kasalukuyang nasa pinyahan ang biktima at nagtatabas ito ng mga damo nang bigla na lamang itong pagbabarilin ng suspek.
Ayon sa ilang kapitbahay ng biktima, nakarinig umano sila ng sunud-sunod na putok mula sa pinyahan at nang kanilang puntahan ay nakita na nila ang duguang biktima.
Nagawa pang isugod sa pinakamalapit na pagamutan ang biktima ngunit idineklang dead-on-arrival.
- Latest