Mayor inambus: Pulis, 2 pa sugatan
MANILA, Philippines — Nakaligtas sa tiyak na kamatayan si Masui, Lanao del Sur Mayor Nasser Pangandaman Jr. habang sugatan ang kanyang police security escort at dalawang kasamang sibilyan matapos silang tambangan sa Buadiposo-Buntong kahapon ng umaga.
Sa ulat ni P/Col. Madzgani Mukarm, Lanao del Sur provincial director, naganap ang pananambang habang sakay ang alkalde ng kanyang motorsiklo papuntang Marawi City. May nakatakda umano siyang meeting sa municipal Peace and Order Council sa nasabing bayan nang tambangan ang kanyang convoy sa Brgy. Gata, Buadiposo-Buntong, may 10 kilometro mula sa Masui. Bagama’t nakaligtas ang alkalde, sugatan ang kanyang police escort na si P/Staff Sergeant Jabbar Romato Pangandaman dahil sa tama ng bala ng baril sa tiyan. Sugatan din ang dalawang sibilyan na sina Jammal Gabriel Pangandaman at Casinoding Mangandog na nasa bukod na sasakyan. Sila ay ginagamot sa Amai Pakpak Medical Center sa Marawi City.
Tinutugis na ng mga sundalo ng 103rd Infantry Brigade ang mga suspek na tumakas.
May hinala ang mga otoridad na “rido” ang sanhi ng pananambang.
- Latest