Radio broadcaster utas sa ambush
MANILA, Philippines — Isang radio broadcaster ang nasawi matapos tamba-ngan ng isang ‘di pa natutukoy na suspek habang sakay ng kanyang kotse na patungo sa kanilang himpilan nitong Huwebes ng umaga sa Dumaguete City, Negros Oriental.
Ang pinaslang na biktima ay kinilalang si Dindo Generoso, 67-anyos, broadcaster sa DYEM 86.7 Bai Radio.
Base sa imbestigasyon, nangyari ang pananambang sa biktima sa kahabaan ng Hibbard Avenue, Brgy. Piapi ng lungsod na ito dakong alas-7:30 ng umaga.
Ayon sa mga testigo, kasalukuyang minamaneho ni Ge-neroso ang kanyang kotse nang biglang sumulpot ang gunman at pagbabarilin ito.
Nabatid na ang biktima ay patungo sana sa kanilang himpilan para sa kanyang programa sa nasabing radio station nang mangyari ang krimen.
Kinondena naman ng National Union of Journalist of the Philippines (NUJP) ang insidente at nanawagan din ng hustisya para sa biktima.
Sa tala ng NUJP si Generoso ang ikalawang mamamahayag na pinaslang matapos itumba rin ng mga armadong salarin ang radio broadcaster na si Edmund Sestoso na pinagbabaril noong Abril 30, 2018 sa Dumaguete City.
Patuloy naman ang masusing imbestigasyon ng mga otoridad sa motibo ng krimen upang matukoy at maaresto ang salarin.
- Latest
