Sundalo utas sa bomba ng NPA

MANILA, Philippines — Isang sundalo ang nasawi matapos masabugan ng bomba na itinanim ng mga rebeldeng New People’s Army (NPA) sa Brgy. Sta Rosa , Lopez, Quezon kamakalawa ng hapon.

Kinilala ang nasawing biktima na si Private Kim A. Veluz, nasa hustong gulang , kasapi ng Alpha Company ng Army’s 85th Infantry Battalion (IB).

Sa imbestigasyon, dakong alas-4:30 ng hapon habang sakay ng kanyang motorsiklo ang biktima at binabagtas ang kahabaan ng kalsada sa Brgy. Sta. Rosa patungong Lopez nang biglang sumabog ang Improvised Explosives Device (IED) na inilagay ng mga rebelde.

Sa lakas ng pagsabog ay nasapul ang katawan ng biktima na agad binawian ng buhay sa insidente.

Samantala, sa-follow up operation ng pulisya at militar natukoy naman ang dalawa sa mga rebelde na responsable sa pagtatanim ng bomba na sina Cecilia Mondia at Hilario de Roxas na ngayo’y tinutugis na ng mga otoridad.