‘State of calamity’ sa lindol, idineklara sa Makilala
NORTH COTABATO, Philippines — Sa pamamagitan ng isang nilagdaang resolusyon ng Sangguniang Bayan, isinailalim na sa “state of calamity” ang buong bayan ng Makilala, lalawigang ito nitong Huwebes dahil sa matinding pinsalang idinulot ng 6.3 magnidtude na lindol na tumama sa nasabing bayan noong Miyerkules.
Layunin ng Resolution Number 46-2019 na nagdedeklara ng state of calamity na makapagpalabas ng pondo para matulungan ang Makilala at mamamayan nito na makabangon sa inabot na delubyo bunsod ng malakas na lindol.
Dahil dito, pinabibilis na ng lokal na pamahalaan ang pagpapalabas ng pondo upang makabili ng mga pangunahing pangangailangan ng mga apektadong pamilya tulad ng mga gamit masisilungan, pagkain, gamot at iba pa.
Sinabi ni Municipal Administrator Sheryl Orbita, umakyat na sa 24 katao ang nasugatan dahil sa lindol sa Makilala. Aabot naman sa 63 na kabahayan ang nasira at marami ang hindi na pwedeng matirhan habang 14 na barangay mula sa 38 ang lubhang naapektuhan dulot ng pagyanig. Tatlo sa nasabing mga barangay ang una nang nagdeklara ng state of calamity.
Samantala, sinabi ni Tulunan Vice Mayor Maureen Ann Villamor na sa Tulunan na siyang sentro ng pagyanig ay pumalo na sa 569 kabahayan ang napinsala ng lindol, base sa ulat ng Phivolcs.
- Latest