Kotse salpok sa gate at bus: Estudyante patay, 3 kritikal
CAVITE, Philippines — Isang estudyante ang patay habang tatlo pa ang nasa malubhang kalagayan makaraang sumalpok ang kanilang kotseng sinasakyan sa isang konkretong gate at pampasaherong bus sa kahabaan ng E. Aguinaldo Highway, Brgy. Lalaan 2nd, Silang, lalawigang ito
Kinilala ni P/Major Resty Soriano, hepe ng pulisya ang nasawi na si Ralph Resare, 19-anyos ng Richmond Homes, Brgy. Navarro habang kritikal ang mga kasamang estudyante na sina Charmaine Garcia, 19; estudyante ng Brgy. Bacao 1, Purok 3, Gen. Trias City; Danica Faith Posadas, 18, ng Richmond Homes, Brgy. Navarro, Gen. Trias City at Gabriel Macasojot, 19, ng Richmond Homes, Brgy. Navarro, nasabing lungsod.
Hawak naman ng pulisya ang driver ng kotse na si Mark Alba, 22, isa ring estudyante ng Lancaster, Brgy. Navarro, Gen. Trias City.
Sa ulat, ala-1:55 ng madaling araw habang sakay ang mga estudyante ng Toyota Vios Sedan (AJA-1615) na minamaneho ni Alba patungong North direction nang biglang mawalan sila ng preno kung kaya tuluy-tuloy ang sasakyan na sumalpok sa konkretong gate na pag-aari ni Justina Manalo Servas, 73, sa Purok 5, Brgy. Lalaan 2 at pati ang tindahan nito ay nawasak din.
Pagkabangga sa gate, hindi pa rin tumigil ang sasakyan hanggang sa makabig pa ng driver ang manibela at sumalpok sa isang pampasaherong Kersteen bus (UVM-469) na nakatigil ng mga oras na iyon.
Sa lakas ng impact, total wreck ang kotse at naipit ang mga estudyante na ikinamatay ng isa habang malubha ang tatlo.
- Latest
