Istriktong pamantayan sa pagkuha ng bagong pulis iniutos ng DILG
MANILA, Philippines — Inatasan ng Department of the Interior and Local Government (DILG) ang National Police Commission (NAPOLCOM) at Philippine National Police (PNP) na maging istrikto at ipatupad ang mataas na pamantayan sa pagkuha ng mga bagong pulis kasunod na rin nang pagbibigay nito ng ‘go signal’ na simulan na ang recruitment ng 10,000 karagdagang bagong police officers.
Ayon kay DILG Secretary Eduardo M. Año, ang pinakamagandang panahon para alisin ang mga ‘undesirables’ o mga ‘di karapat-dapat na maging pulis ay sa panahon pa lamang ng recruitment process.
Aniya, dapat na tiyakin ng NAPOLCOM at PNP na ang iha-hire lamang nila ay yaong may sapat na kakayahan, morally upright at ipatutupad ang batas ng walang takot at pabor.
Nauna rito, inaprubahan ng NAPOLCOM, na pinamumunuan din ni Año ang recruitment ng may 10,000 Patrolmen at Patrolwomen sa pamamagitan ng Resolution No. 2019-707.
Nabatid na ang 7,895 sa mga ito ay itatalaga sa PNP Mobile Forces sa ilalim ng 17 Police Regional Offices (PROs) sa buong bansa habang ang 2,105 pang bagong recruits ay itatalaga naman sa National Support Units (NSUs) at iba pang tanggapan ng PNP.
Sinabi ni Año na ang pagkuha ng karagdagang 10,000 police officers ay hindi madaling trabaho, dahil dapat aniyang tiyakin ng PNP na ang makukuha lamang nilang indibidwal ay yaong makapagbibigay ng kontribusyon para sa pagtupad ng kanilang mandato at magiging asset ng police organization.
- Latest