2 dating pulis tiklo sa droga
MANILA, Philippines – Dalawang dating pulis na sangkot umano sa pagtutulak ng bawal na gamot ang nadakip sa magkakahiwalay na operasyon ng mga tauhan ng Philippine National Police at ng Philippine Drug Enforcement Agency sa Cavite at Albay kamakalawa.
Sa isang buy-bust operation sa Barangay Banaba Cerca, Indang, Cavite kamakalawa ng gabi, nasakote ng pinagsanib na puwersa ng Indang Police at PDEA si Paul Jason Sanchez, 35, dating miyembro ng PNP na nag-AWOL (absent without leave) mula noong Nobyembre 2015 makaraang masangkot sa droga.
Sa nakalap na ulat mula kina P/SSg. Karl Marty Manzilla at Pat. Mark Anthony Nga ng Drug Enforcement Team Operatives ng Indang Municipal Police Station, ilang araw na minatyagan ng pulisya si Sanchez at nang matiyak na nagtutulak ito ng droga ay ikinasa nila ang buy- bust operation.
Nakuha kay Sanchez ang ilang piraso ng sachet na naglalaman ng hindi pa mabilang na shabu at mga drug paraphernalias at buybust money na ginamit.
Samantala, isang dating miyembro ng Sorsogon Police na si Zandro Nebria Oscillada, 47, ang naaresto ng magkasanib na puwersa ng Daraga Police at PDEA ang nadakip sa isang buy-bust operation sa Daraga, Albay kamakalawa ng hapon.
Si Oscillada ay dating miyembro ng Sorsogon Police na natanggal sa serbisyo noong 2005 makaraang mag-AWOL.
Itinuturing si Oscillada na isang high value target. Hindi na siya nakapalag nang dakmain ng mga awtoridad sa buy bust operation. Nakuha sa kanya ang limang sachet ng shabu at buy-bust money. Jorge Hallare
- Latest