3 ‘tulak’ bulagta sa shootout
MALOLOS CITY, Bulacan, Philippines — Tatlong hinihinalang tulak ng ipinagbabawal na droga ang napatay ng mga otoridad sa magkakahiwalay na drug operation sa lalawigang ito kamakalawa at kahapon ng madaling araw.
Sa bayan ng San Ildefonso, napatay si Ben Angelo Tacadena, matapos na manlaban sa mga pulis sa isinagawang buy-bust operation sa Brgy. Maasim dakong alas 4:00 ng umaga. Narekober dito ang isang cal .38 revolver, anim na plastic sachet ng shabu at buy-bust money.
Sa bayan ng San Rafael, dakong alas-4:30 ng madaling-araw nang mapatay ang isang alias “Tonio” sa isinagawang buy-bust sa Brgy. San Roque. Nabawi dito ang isang cal .38 revolver, 8 plastic sachet ng shabu at buy-bust money.
Napatay din sa Plaridel si Melvin Padojelaga, 20, ng Brgy. Sta. Ines matapos na makipagbarilan sa mga pulis sa buy-bust operation sa Sitio Dapdap, Brgy. Banga 1st dakong ala-1: 20 kahapon ng madaling araw. Narekober dito ang isang cal .38 revolver, 16 plastic sachet ng marijuana at buy-bust money.
Samantala, 23 pa ang inaresto ng mga otoridad kahapon ng madaling araw, kabilang dito ang 9 na adik na nahuli sa aktong humihitit ng shabu sa pinaigting na operasyon ng Bulacan Police. Natimbog din ang pitong wanted persons na nahaharap sa iba’t ibang kasong kriminal at pito pang lalaki na naaktuhang nagsusugal ng tong-its at cara y cruz.
- Latest