Bulacan buy-bust: 4 ‘tulak’ utas, 23 timbog
SAN JOSE DEL MONTE CITY, Philippines — Apat na hinihinalang tulak ng ipinagbabawal na droga ang napatay ng mga awtoridad habang 23 pa ang naaresto sa isinagawang magkakasunod na buy-bust operation sa Bulacan kahapon ng madaling araw.
Kinilala ni P/Lt. Col. Orlando Castil Jr., hepe ng pulisya, ang apat na napatay na sina John Frederick Mallo; Eugenio Lopez, 39-anyos ng Blk. 14, Lot. 5, Brgy. San Rafael 1, San Jose del Monte City, Bulacan; isang alias “Van” at isang alias “Jay”.
Napatay si Mallo sa Brgy. Gaya-gaya, SJDM dakong alas-12:45 ng madaling araw matapos umanong manlaban sa buy-bust ng mga pulis. Nakuha sa suspek ang isang cal .9mm pistol, 9 na plastic sachet ng shabu at buy-bust money.
Sina Lopez, alias Van at alias Jay ay napatay naman sa Brgy. San Rafael, SJDM dakong ala-1:40 ng madaling araw matapos na pumalag at makipagbarilan sa drug operation ng mga pulis. Nabawi sa tatlong tumimbuwang ang 19 plastic sachet ng shabu, dalawang improvised shotgun o sumpak, isang cal .38 revolver, improvised tooter at buy-bust money.
Samantala, 23 katao pa na umano’y tulak ng droga ang naaresto ng pulisya sa magkakahiwalay na buy-bust operation sa siyudad ng San Jose del Monte, San Miguel, Bocaue at Sta. Maria. Nabawi sa mga suspek ang 15 plastic sachet ng shabu, mga drug paraphernalia at buy-bust money.
- Latest
