Parak nabaril ng lady cop sa drug ops
MANILA, Philippines — Isang bagitong parak ang nasapol ng bala sa tiyan makaraang aksidenteng pumutok ang ikinasang baril ng kasamahang babaeng pulis na miyembro ng anti-drug unit habang nasa drug operation sa San Pedro City, Laguna kamakalawa.
Sa ulat ni Laguna Provincial Police Office (PPO)Director Police Colonel Eleazar Matta, kinilala ang pulis na si Patrolman Audrey Reyes, 30, may asawa at nakatalaga sa San Pedro City Police Station na nilalapatan na ng lunas sa Perpetual Help Hospital sa Biñan City.
Ang responsable naman sa pagkakabaril kay Reyes ay si Patrolwoman Shalimar Gammaru.
Sa ulat, alas-12:45 ng madaling araw, kagagaling lamang ng mga operatiba ng Drug Enforcement Unit (DEU) kasama ang biktima sa anti-drug operation nang pansamantalang mamahinga umano sila sa may #435 Quezon Street Putol, Brgy. San Antonio. Gayunman, aksidente umanong naikasa ng lady cop ang kanyang 9mm Glock pistol na pumutok at tumama sa tiyan ng biktima.
- Latest
