13 bgy. sa Zamboanga City nalubog, 4K katao inilikas
MANILA, Philippines — Umaabot sa 13 barangay sa lungsod ng Zamboanga ang lubog sa baha sanhi ng malalakas na pag-ulang dulot ng bagyong Marilyn, ayon sa ulat kahapon.
Sinabi ni Police Regional Office (PRO) 9 Spokesperson Police Major Helen Galvez, nasa 65 kabahayan ang naapektuhan ng mga pagbaha at nasira kabilang ang isang mosque.
Dahil dito, nasa 598 pamilya o mahigit 4,000 residente sa lugar ang inilikas sa mga evacuation centers.
Ayon sa mga residente, nagulantang na lamang sila sa pagragasa ng tubig sa kanilang mga barangay na nagsimula nitong Biyernes dahil sa nasabing bagyo.
Nagsagawa na ng relief and rescue operations sa mga apektadong lugar ang Zamboanga City Police sa pangunguna ni P/Col. Joseph Martir katuwang ang Armed Forces of the Philippines (AFP), Bureau of Fire Protection, Philippine Coast Guard at lokal na pamahalaan.
Ipinagbabawal pansamantala ang mga aktibidad sa karagatan partikular na ang pangingisda upang maiwasan ang panganib.
- Latest
