Kuya kinatay, 1 pang utol sugatan

URDANETA CITY, Pangasinan, Philippines – Patay ang isang 35-anyos na lalaki samantalang sugatan ang isa pa nang saksakin sila ng kanilang nakababatang kapatid sa Zone 1, Brgy. Nancalobasaan, dito, inulat kahapon.  

Sa ulat, kinilala ang nasawi na si Ricky Garonia, habang ang nasugatan ay si Michael Garonia, 32. Agad namang naaresto ang kanilang kapatid na suspek na si Leo Ric Garonia, 26.

Sa pagsisiyasat, habang nag-iinuman ang magkakapatid sa kanilang compound bandang alas-6 ng gabi noong Linggo nang magkaroon sila ng pagtatalo hanggang sa undayan ng saksak ng pinakabata ang kuyang si Ricky.

Sinubukang umawat ni Michael pero maging siya ay sinaksak ng suspek at tinamaan sa kanang kamay. Nadakip si Leo at narekober ang isang 13-pulgadang bayoneta mula rito.