Tserman sa Bulacan utas sa ambush
BALIWAG, Bulacan, Philippines — Tadtad ng tama ng bala ng baril sa iba’t ibang parte ng katawan ang isang barangay captain sa bayang ito matapos na tambangan at pagbabarilin ng riding-in-tandem kahapon ng umaga sa Brgy. Tarcan ng nasabing bayan.
Kinilala ni P/Lt. Col Abraham Hambon, hepe ng Baliwag Police ang napaslang na kapitan na si Ronaldo Rivera alyas Kapitan Lupa, 43 anyos, may-asawa, chairman ng Brgy. San Jose, Baliwag, Bulacan.
Sa inisyal na report, dakong alas-10:45 ng umaga, habang ang biktima ay magde-deliver ng buhangin sa bahay ng kasamahan nitong tserman na si Ariel Cabingao ng Brgy. Tarcan nang bigla na lamang siyang pagbabarilin ng dalawang lalaki na magkaangkas sa isang motorsiklo.
Napag-alaman na ang negosyo ng biktima ay gravel and sand at siya mismo ang nagbibiyahe ng mga umoorder sa kanya ng panambak o mga buhangin kung kaya nabansagan siyang “Kapitan Lupa”.
Ang biktima ay kilalang agresibo umano sa kampanya laban sa illegal na droga sa kanyang nasasakupan at marami na umano siyang pinahuli at ipinakulong na mga tulak at adik. Posible umanong may kinalaman sa droga ang pagkakapaslang sa tserman dahil sa nasabing mahigpit nitong kampanya laban sa illegal drugs.
- Latest