Negosyante, misis utas sa road rage!
MALOLOS CITY, Bulacan, Philippines — Dead-on-the-spot ang isang negosyante habang binawian ng buhay sa pagamutan ang misis nito matapos silang pagbabarilin ng isang motorista na kanilang nakaalitan sa Brgy. Mojon ng nasabing siyudad, kamakalawa.
Kinilala ni P/Lt. Col. Emerey Abating, acting chief ng Malolos City Police, ang mga nasawi na sina Christian Espi-ritu, 35, at asawang si Mary Chris, 29, kapwa residente ng No. 36, Mayabong St., Maunlad Homes Subdivision, Brgy. Mojon, Malolos City, Bulacan.
Sa imbestigasyon, dakong alas-4:30 ng hapon nang aksidenteng banggain ng motorsiklo lulan ng ‘di pa nakikilalang suspek ang bumper ng kotse ng mag-asawang Espiritu habang sila ay sakay nito at nakaparada sa harap ng kanilang bahay.
Dahil dito, bumaba ng sasakyan si Christian at sinita ang suspek hanggang sa magkaroon sila ng mainitang pagtatalo.
Sa puntong iyon, napansin ni Christian na bumubunot ng baril ang suspek kung kaya mabilis siyang tumakbo at maging ang kanyang misis papasok ng kanilang bahay. Nasa tarangkahan pa lamang ng kanilang tahanan ang mag-asawa nang sila ay pagbabarilin ng nakasunod na suspek.
Agad na bumulagta at nasawi ang negos-yante dahil sa tinamong mga tama ng bala ng baril sa iba’t ibang parte ng katawan habang nasapol ng bala sa ulo at katawan ang kanyang asawa na nagawa pang maitakbo sa Sacred Heart Hospital at kalaunan ay inilipat sa Bulacan Medical Center kung saan siya binawian ng buhay dakong alas-7:10 ng gabi.
Nagsasagawa na ng manhunt operation ang Malolos Police para sa agarang ikadarakip ng suspek at matukoy ang pagkakakilanlan nito.
- Latest