3 magsasaka todas sa clan war
KIDAPAWAN CITY, Philippines — Patay ang tatlong magsasaka na sinasabing asset ng militar matapos silang pagbabarilin habang pauwi mula sa kanilang sakahan dahil sa sinasabing “rido” o away pamilya sa Sitio Basak, Barangay Tugal, Midsayap, North Cotabato kamakalawa ng gabi.
Sa ulat ng Midsayap Police sa pangunguna ni Benito Rotia Jr., kinilala ang mga nasawi na sina Ogie Vicente Bantas, 42-anyos; Motalib Cabilangan Talungon, 27 at Ismael Sumbaga Sumunsang, 37, pawang residente sa lugar.
Ang mga suspek sa pagpatay ay natukoy namang sina Tsin Salindab alyas Zainudin, Abdul Kulilong alyas “Dekinia Kulilong” at Thoy Zumbaga, mga miyembro umano ng Bangsamoro Islamic Freedom Fighters (BIFF) na may kinakaharap na kaso ring pagpatay sa bayan.
Ayon kay Major Arvin John Encinas, spokesman ng AFP-Western Mindanao Command (Westmincom), bandang alas-8:20 ng gabi pauwi na ang tatlong biktima galing sa sakahan nang tambangan at pagbabarilin ng mga suspek bunsod ng tinamong mga tama ng bala sa katawan buhat sa M14 rifle at 7.62mm. Joy Cantos
- Latest