Trike inararo ng bus: Driver patay

SAN NARCISO, Quezon, Philippines – Patay ang isang driver makaraang araruhin ang kanyang minamanehong tricycle ng pampasaherong bus sa Brgy. Buenavista, kamakalawa ng madaling araw.

Hindi na umabot pang buhay sa ospital dahil sa grabeng pinsala sa ulo at katawan ang biktimang si Donald Mc Dowell, 50, may asawa ng Brgy. Rizal samantalang ginagamot sa Bondoc Peninsula District Hospital ang pasahero niyang si Dominic Lumpiado.

Sa ulat, pansamantalang inihinto ni Mc Dowell ang ipinapasadang tricycle sa tabi ng kalye nang banggain ito ng San Andres bound Barney Bus (UYD-271) na minamaneho ni Randy Miguel ng Macalelon, Quezon dakong alas-3:00 ng madaling araw.

Sa lakas ng banggaan, tumilapon ang tricycle kasama ang mga sakay na biktima.

Nakapiit na sa municipal jail ang tsuper ng bus.