Pamangkin inutas ng tiyo!
CAVITE, Philippines — Patay ang isang mister na pabalang kung sumagot matapos na hambalusin ng bakal sa ulo ng sarili nitong tiyuhin nang magkapikunan ang dalawa habang nag-iinuman kamakalawa ng gabi sa Brgy. Alapan 1A, Imus City.
Patay agad ang biktimang si Felipe Bobis, nasa hustong gulang, residente ng Brgy. Bulihan, Silang, Cavite dahil sa matinding sugat sa ulo habang arestado ang tiyuhin nito na si Jaime Bobis Laureles, 59-anyos, driver, at residente ng B16, L3, Regal Homes, Brgy. Alapan I-A, Imus City, Cavite.
Sa imbestigasyon ng pulisya, nag-iinuman ang magtiyuhin kasama ang iba pang mga kapitbahay nang magkaroon ng hindi pagkakaintindihan ang dalawa.
Lalong nagkaroon ng mainitang pagtatalo ang dalawa nang sumagot-sagot ng pabalang ang biktima. Nabatid na hindi matanggap ng suspek ang pagsagot sa kanya ng pabalang ng pamangkin kung kaya nauwi sa pagtatalo ng mga ito hanggang sa mapikon ang suspek at dinampot nito ang isang bakal at inihambalos sa biktima.
Sa ulo tinamaan ang biktima na agad na bumulagta at nangisay. Naitakbo naman siya sa pagamutan subalit hindi na umabot nang buhay habang dinakip ng mga rumespondeng pulis ang suspek na kasalukuyan nang nakakulong.
- Latest