Labas-pasok sa kulungan nalambat muli sa droga

ANGELES CITY  , Philippines  —  Isang tricycle driver na labas-pasok sa kulungan at aminadong nagbebenta ng ipinagbabawal na droga ang muling nalambat habang mabilis na nakatakas ang dalawang kasamahan nito na tumalon sa ikatlong palapag ng gusali makaraang makatunog na pulis ang katransaksyon  sa isinagawang buy-bust operation ng Angeles City Police Drug Enforcement Unit sa A. Santos Extension, Barangay Balibago, iniulat kahapon.

Sa report sa tanggapan ni Angeles City Police Drug Enforcement Unit chief P/Capt. Joven Rodriguez, kinilala ang nadakip na si Jay-Ar Mercado, 25, habang pinaghahanap ang mga kasabwat nito sina Ivan Dayaon, at Omar Mojaimen, kapwa nasa hustong gulang at residente ng nasabing lugar.

Nasamsam kay Mercado ang 9 na plastic sachet ng hinihinalang shabu na nasa P137,500 ang halaga. dalawang plastic sachet ng pinatuyong dahon ng marijuana, mga drug paraphernalia at marked money. Siya ay kakasuhan ng paglabag sa R.A. 9165. Nabatid na ilang beses na umanong pabalik-balik sa kulungan si Mercado dahil sa mga kaso ring pagtutulak ng droga.