Abogadong Kano sugatan sa ambush
ANGELES CITY, Pampanga , Philippines — Isang American national ang malubhang nasugatan matapos na tambangan at pagbabarilin ng hindi pa kilalang mga suspek sa kahabaan ng Campupot Street, Barangay Pampang ng lungsod na ito noong Biyernes ng gabi.
Sa ulat sa tanggapan ni P/Major Fercel Deloria, commander ng Angeles Police Station 2, kinilala ang biktima na si Kenneth Graham, 52, may asawa, residente sa nasabing barangay.
Sa inisyal na ulat pasado 10:30 ng gabi pauwi sa kanyang bahay ang biktima nang biglang dikitan ng isang lalaki saka pinagbabaril. Matapos isagawa ang krimen sabay takas sa ’di malamang direksyon. Agad isinugod ang biktima sa pinakamalapit na ospital.
Ligtas na sa kamatayan ang biktima, ayon sa sumuring doktor na sinasabing nagtamo ng dalawang tama ng bala sa kanyang katawan.
Patuloy pa rin ang isinasagawang malalimang imbestigasyon ng pulisya upang matukoy ang motibo sa tangkang pagpaslang at mahuli ang salarin.
- Latest
