Chinese natagpuang patay

NUEVA ECIJA  , Philippines  —  Patay na nang matagpuan ng kanyang tauhan ang isang 33-anyos na Chinese national sa inuupahan nitong apartment sa Rizal Street, Brgy. Rizal, Santa Rosa noong Linggo ng gabi.

Ayon sa Santa Rosa Police, natagpuan ni Sulamita Saldivar, isang Filipina employee, 43, may-asawa, ng Barangay Poblacion West, Rizal, Nueva Ecija, ang bangkay ng kanyang boss na si Chaofei Rong, 33, binata, project manager ng Century Star Advance Construction Inc., at nakatira sa Peras Apartment sa nasabing lugar.

Bandang alas-7:05 ng gabi nang matagpuan umano ni Saldivar ang bangkay ni Rong na naliligo at napapalibutan umano ng sariling suka nito. Ayon sa pulisya, wala silang nakitang senyales ng komosyon o “struggle” sa pagkamatay ng biktima at masusi umano nilang inaalam kung ano ang nakain ng biktima at malamang na na-food poison.