Karambola ng 3 sasakyan: 2 dedo
TUGUEGARAO CITY, Cagayan , Philippines — Dalawa ang nasawi habang dalawa ang sugatan sa salpukan ng tatlong sasakyan kasama ang isang Victory Liner bus sa Brgy. Tarinsing, Cordon Isabela kahapon.
Kinilala ng pulisya ang mga nasawi na sina Marconi Ramos, 48, at ang hindi pa natukoy na pasahero sa kanyang traysikel habang ang mga sugatan ay sina Arwel Alpecho, 25, at ang angkas nito sa motorsiklo na si Diana Rose Canlas, 24.
Lumalabas na sinalpok ng nasabing bus na patungong norte ang traysikel na biglang tumawid sa harapan nito at siya namang nabangga ng motorsiklo na bumabagtas sa kabilang linya dakong alas-3:00 ng madaling araw.
Isinugod sa pribadong pagamutan ang apat na biktima subalit hindi na nakaabot nang buhay sina Ramos at ang pasahero nito.
Isinailalim naman sa kustodya ng awtoridad and drayber ng bus na si Christopher Aggarao, 40, at kanyang hawak na sasakyan matapos ang insidente.
- Latest