Bagitong solon na nanuntok ng waiter inireklamo sa pulisya
Legazpi City, Albay, Philippines — Isang waiter ng isang fast food restaurant sa Rizal St., Old Albay District, Legazpi City, Albay ang nagharap ng reklamo sa pulisya laban sa isang partylist congressman dahil sa panununtok nito sa kanya kamakalawa ng madaling-araw.
Kinilala ang suspek na si Rep. Alfred Delos Santos ng Ang Probinsiyano Partylist habang nakilala naman ang nagreklamo na si Christian Kent Alejo, 20-anyos, waiter ng Bigg’s Diner at residente ng Purok-1, Brgy.15 Ilawod East.
Isinaad sa reklamo na naglalagay si Alejo ng place mat sa mesa ni De Los Santos at tatlo nitong kasamang lalake nang bigla siyang suntukin ng baguhang mambabatas.
Gayunman, nakailag umano ang biktima kaya ang suot na sombrero niya ang natanggal. Agad siyang dumulog sa Legazpi Police Station at ipinarekord ang nangyari dahil sa takot.
Sa impormasyon, posibleng lasing ang suspek at nagalit dahil natitigan umano siya nang masama ng biktima.
Patuloy pang iniimbistigahan ang insidente na nakunan ng cctv camera ng fastfood restaurant. Wala pang pahayag ang kongresista hinggil sa insidente.
- Latest
