Kawani ng DENR nilikida, 5 parak dinisarmahan ng NPA

TUGUEGARAO CITY, Cagayan, Philippines — Brutal na pinatay ng mga sinasabing rebeldeng New People’s Army ang isang kawani ng Department of Environment and Natural Resources (DENR) at dinis-armahan pa ang limang pulis sa liblib na Brgy. Sindon Bayabo, Ilagan City, Isabela noong Biyernes.

Sa report ng pulisya, natagpuan ang duguang bangkay na tadtad ng bala ni Celso Asuncion, 58, kawani ng DENR Provincial Office dakong alas-7:30 ng umaga.

Si Asuncion ang tumatao sa opisina ng Environmental Protection Task Force na nagmamanman at nag-uulat sa mga nagaganap na illegal logging activities sa kabundukan ng Sierra Madre kung saan ginagawa ang Ilagan City-Divilacan Road sa tabi ng Pacific Ocean.

Ayon kay Lt. Col. Chievalier Iringan, tagapagsalita ng Cagayan Valley Police Office, sa hindi kalayuan ay pinigil din ng parehong grupo ng NPA-Southern Front Committee na pumatay kay Asuncion ang limang pulis na dumaan sa lugar sakay ng isang pickup. Dinis-armahan at pinagnakawan pa ng mga rebeldeng pinangunahan ni “Ka Uno” at “Ka Damian” sina Corporals Gaudencio Castillo Jr., Earl Brian Gannaban ng Cauayan City Police Station; Staff Sergeant Fernando Capillan ng Cordon; Master Sergeant Julius Baribad at Corporal Bryan Balisi ng Divilacan na kalaunan ay pinalaya.