Holdaper patay sa encounter

ANGELES CITY , Philippines  —   Napatay ng mga otoridad ang isang umano’y holdaper matapos maki­pagbarilan sa pulisya sa Villa Rosario Street, Brgy. Pampang ng lungsod noong Martes ng gabi.

Sa ulat sa tanggapan ni P/Major Fercel Deloria, Police Station 2 commander, pasado alas-10:45 ng gabi ay nakatanggap ng tawag ang kanilang opisina na isang ginang na kinilalang si Ma. Rhea Bamba, 25, residente ng Purok 1, Brgy. Pampang ang hinoldap.

Sa imbestigasyon, pauwi na ang biktima nang biglang tutukan ng baril ng ‘di kilalang suspek lulan ng motorsiklo at sapilitang kinuha ang kanyang sling bag na naglalaman ng importanteng gamit at cash,

Agad na ini-report ang pangyayari at tiyempong nagpapat­rolya ang mobile ng pulis kaya’t agad na nakaresponde at nagsagawa ng manhunt operation laban sa suspek.

Naispatan naman nila ang suspek at nang kanilang makorner ay dito na nagpaputok ng kanyang baril kung kaya napilitang gumanti ang mga otoridad sanhi ng kanyang agarang kamatayan.

Narekober sa suspek ang isang cal.38 baril, tatlong small plastic heat sealed sachet ng shabu, drug paraphernalia at sling bag na kulay pink na tinangay nito sa biktima.