Tserman itinumba sa Father’s Day

NUEVA ECIJA  , Philippines  —  Malungkot ang pagdiriwang ng Father’s Day ng pamilya ng isang barangay chairman matapos na tambangan at pagbabarilin ang huli ng mga hindi kilalang salarin sa tapat mismo ng kanyang tahanan sa Purok 4 ng Barangay San Ricardo, bayan ng Talavera ng lalawigang ito, kamakalawa ng gabi.

Ayon kay Police Lt. Col. Alexie Desamito, hepe ng Talavera Police, nasawi agad ang biktima na si Barangay Captain Arniel Bernardo, 61-anyos, may-asawa, dahil sa mga tama ng bala sa katawan.

Sa imbestigasyon, bandang alas-10:40 ng gabi nangyari ang pana­nambang sa tserman habang kadarating lang nito sa gate ng kanyang bahay.

Napag-alaman na nagbisikleta lang paalis at pabalik ang biktima sa kanilang bahay galing sa isang ka-barangay. Nang makarating sa kanila, dito na umano walang habas na pinagbabaril ang tserman ng mga nakaabang na suspek. Agad na tumakas ang mga suspek patungo sa silangang direksyon o sa bayan ng Llanera, NE.

Patuloy na sinisiya­sat ng pulisya kung may kinalaman sa trabaho bilang tserman o personal ang motibo sa pagpatay.