Onsehan sa droga: 5 ‘tulak’ itinumba
MANILA, Philippines — Bulagta ang limang sinasabing kilabot na tulak ng droga na pinaniniwalaang nang-onse sa kanilang kasamahan nang ratratin ng mga armadong suspek sa isang drug den umano sa Brgy. San Padro, San Jose del Monte City, Bulacan nitong Huwebes ng umaga.
Ang mga napatay ay sina Norberto Oden, 63; Manuelito Bergonio alyas “Noknok”, 35, nasa drug watchlist at may nakabimbing kaso ng carnapping; Juliet Fernandez, nasa hustong gulang, at tagapamahala umano ng drug den; isang alyas “Mel Diezel”, nasa drug watchlist din; at isang hindi pa nakilalang biktima.
Sa ulat ng pulisya, dakong alas-8:00 ng umaga nang maganap ang pamamaril sa umano’y drug den sa naturang lugar.
Sa pahayag ng mga residente sa lugar, nakarinig sila ng sunod-sunod na putok ng baril at kasunod nito ay mabilis na nagsitakas ang mga armadong suspek.
Sa pagresponde ng mga pulis sa pinangyarihan ay dito na tumambad ang mga nakabulagtang biktima at narekober ang 10 piraso ng basyo ng cartridge ng cal. 45 pistol, anim na piraso ng cal. 40 cartridge, dalawang piraso ng hindi pa naipuputok na bala ng cal. 45 pistol, mga basyo ng bala ng cal. 40 at cal. 45 pistol.
Gayundin ang isang malaking plastic sachet ng shabu at pitong maliliit na plastic sachet ng shabu.
Sa testimonya ng mga residente sa lugar at mga kamaganak ng biktima, kinumpirma ng mga ito na sangkot ang mga biktima sa pagtutulak ng droga sa kanilang lugar.
- Latest
