Datu ng tribo dinukot, kinatay ng NPA
MANILA, Philippines — Natagpuang patay ang isang datu ng tribo ng mga katutubo makaraan itong dukutin ng limang mga armadong kalalakihan na pinaghihinalaang mga rebeldeng New People’s Army (NPA) sa Sitio Tagbuaya, Brgy. Bangonay, Jabonga, Agusan del Norte kamakalawa.
Kinilala ang biktima na si Rodito Lapugan Boklas alyas Datu Boklas, 40 taong gulang, Datu ng tribo ng mga katutubong Mamanwa.
Sa ulat ng CARAGA Police, bandang alas-9 ng umaga nang matagpuan ng asawa at anak ng biktima ang bangkay ng huli na may mga saksak sa katawan sa kabundukan ng Mt. Amontay, Sitio Tagbuaya, Brgy. Bangonay.
Ang biktima ay binihag ng mga armadong lalaki sa tahanan nito sa nabanggit na lugar dakong alas-12 ng tanghali noong Mayo 20 o isang araw bago nadiskubre ang bangkay nito. Narekober din sa lugar ang isang itak na sumusukat ng 23 pulgada na pag-aari ng biktima.
Ang nasabing lugar ay pinamumugaran ng NPA rebels sa ilalim ng North Eastern Mindanao Regional Committee (NEMRC) Guerilla Front 16 A na pinamumunuan nina Ka Gab Monter at Sadam Dayong.
- Latest