Motorbanca lumubog: 50 pasahero nasagip
MANILA, Philippines — Maswerteng nakaligtas ang nasa 50 pasahero at crew ng Sam Christopher Vessel matapos na lumubog ito ilang sandali makaraang umalis ng Sta. Ana wharf sa Davao city kahapon ng umaga.
Sa ulat ni Staff Sgt. Sevner Neri, ang imbestigador ng Sta. Ana police station, umalis ang nasabing motorbanca sa nasabing pantalan sa lungsod ng Davao alas-7:55 ng umaga kahapon patungo na sana ng Talicud Island sa Samal Island nang biglang lumubog ang nasabing bangka.
Nabatid na nagkasabit-sabit umano ang isang lubid sa propeller ng bangka dahilan para tumigil ang makina at dahan-dahang lumubog ang nasabing bangka sa gitna ng dagat.
Pero agad namang nakahingi ng saklolo ang drayber ng banka at lahat naman ng mga pasahero na 45 kasama na ang limang mga crew ay mabilis namang nailigtas pasado alas-8:00 ng umaga kahapon.
- Latest
