2 barangay chairman itinumba
MANILA, Philippines — Patay ang dalawang barangay chairman nang pagbabarilin ng hindi pa nakikilalang salarin sa magkahiwalay na krimen sa Zamboanga del Norte at Zamboanga del Sur nitong Sabado.
Kinilala ang mga biktima na sina Edgardo Viñas, 49, punong barangay ng Barangay Dapaon, Sindangan at presidente ng Association of Barangay Captains ng Sindangan, Zamboanga del Norte, at Ibrahim Ungad, chairman ng Barangay New Labangan, Zamboanga Del Sur.
Sa ulat na nakarating kay Police Regional Office 9 Director Police Brigadier General Emmanuel Luis Licup, unang binaril si Viñas sa ABC Hall sa Barangay La Roche, Sindangan bago mag alas-12:00 ng tanghali.
Batay sa imbestigasyon, katatapos lang ng kanilang session nang barilin si Viñas ng suspek gamit ang isang long firearm.
Tumakas ang suspek na nakasuot ng itim na damit at pulang helmet sakay ng isang motorsiklo patungong J. Teaño Street sa Barangay Goleo.
Makalipas ang ilang oras ay sumunod namang pinatay sa labas ng kanyang bahay si Ungad sa Purok Caimito sa Barangay Tuburan, Pagadian City, Zamboanga del Sur.
Batay sa imbestigasyon, alas-6:45 ng gabi habang palabas ng bahay ang biktima at pagdating sa kanilang gate ay doon na ito nilapitan ng hindi nakilalang suspek at binaril gamit ang isang improvised 12-gauge shotgun.
Tumakas ang suspek sakay ng hindi naplakahang motorsiklo patungong Barangay Tiguman, Pagadian City.
- Latest