Campaign leader ng governor itinumba!

NORTH COTABATO – Pinasok at pinagbabaril hanggang sa mapatay ang isang 56-anyos na campaign leader ni incumbent South Cotabato Governor Daisy Avance Fuentes habang nagkakape sa kanilang bahay sa Brgy. Linan, Tupi, South Cotabato kamakalawa ng hapon.

Kinilala ng pulisya ang biktima na si Mario Avellana Fuentes, 56, may-asawa, magsasaka at residente ng nasabing lugar.

Sa imbestigasyon, pinasok ng suspek ang pamamahay ng biktima at nagtanong kung sino si Mario.

Nang sumagot ang biktima na siya si Mario, agad siyang binaril sa ulo ng suspek sanhi upang bumulagta sa sahig. Habang nakadapa, muling binaril sa ulo ng suspek na agad tumakas matapos ang krimen pasado alas-4:00 ng hapon. Isinugod sa ospital si Fuentes ngunit binawian din ng buhay.