32 sugatan sa karambola
SANTIAGO CITY, Isabela , Philippines — Tatlumpu’t dalawang katao ang nasugatan matapos magkarambola ang tatlong sasakyan sa Sta. Maria, Isabela, kamakalawa ng gabi.
Ayon sa ulat ng Sta. Maria Police, dakong alas-8 ng gabi nang aksidenteng matumbok ng isang Toyota Fortuner na minamaneho ni Dr. Jerome Wangdali, residente ng Sta. Teresita, Iguig, Cagayan ang sinusundan na kuliglig na minamaneho naman ni Biyo Danga ng Tuao, Cagayan.
Dahil sa lakas umano ng pagkasalpok ng Toyota Fortuner sa kuliglig na kapwa patungong hilaga ay inokupa ng mga ito ang dalawang linya ng kalsada.
Sakto naman na paparating ang isang Florida bus line na patungong Manila mula sa Sta. Ana, Cagayan kaya nahagip umano ng gulong nito ang dalawang nakaharang na sasakyan.
Bunsod nito, sumabog ang kaliwang gulong sa harapan ng bus na naging dahilan para bumaliktad ito sa kalsada. Agad na isinugod sa pagamutan ang 30 sakay ng Florida bus at ang driver ng kuliglig at SUV.
- Latest