P257-million ‘floating cocaine’ nalambat

MANILA, Philippines — Umabot sa 40 bloke ng cocaine na nagkakahalaga ng higit sa P257-M ang narekober ng mga otoridad matapos malambat ng mga mangingisda sa karagatan ng Burgos, Surigao del Norte kamakalawa ng hapon.

Sa ulat ni CARAGA Police Director Police Brig. Gen. Gilbert Cruz, dakong alas-4:30 ng hapon nang madiskubre ang palutang-lutang na mga kahon na pinaglalagyan ng mga kontrabando na aabot sa 40 bloke ng mga mangingisdang sina Alvin Dumanjog, Rodolfo Romeo at iba pa sa karagatan ng bayan ng Burgos.

Ayon sa opisyal, ang narekober na bloke-bloke ng droga ay tumitimbang ng 48.575 kilo at may kabuuang halaga na P257.4-milyon.

Sinabi ni Cruz na ang mga narekober na bloke ng cocaine ay nasa kustodya na ng pulisya at nakatakdang suriin sa Provincial Crime Laboratory Office ng Police Regional Office (CARAGA Region) 13.

Samantalang may markings din ang mga kartong pinaglalagyan ng mga ito na “3 B” Bugatti.

Una nang inihayag ni PNP Chief Police General Oscar Albayalde base sa report ng kanilang mga dayuhang counterparts na hindi sa bansa ibebenta ang nasabing bloke-bloke ng cocaine na ide-deliver ng sindikato ng droga sa Papua New Guinea.

Pinaniniwalaan naman na Colombian drug cartel ang nasa likod ng mga narekober na cocaine.