Amok: Trader patay, pinsan kritikal
TALAVERA, Nueva Ecija , Philippines — Patay ang isang 47-anyos na negosyante habang nasa malubhang kalagayan ang kanyang pinsan makaraan silang pagtatagain ng isang nag-amok na lalaki sa Brgy. Dimasalang Sur sa bayang ito noong Sabado ng hapon.
Kinilala ang nasawi na si Reynaldo Agustin, 47, may-asawa, may-ari ng sari-sari store ng nasabing barangay na nagtamo ng matitinding pinsala sa ulo at katawan habang inoobserbahan sa Talavera General Hospital ang pinsan na si June Fernando, 52-anyos, may-asawa, isang tricycle driver.
Samantala, naaresto ilang oras matapos ang insidente ang suspek na si Carmelo Dela Cruz, 64, binata, walang trabaho ng nasabi ring barangay at narekober sa kanya ang ginamit nitong itak.
Bandang alas-3:30 ng hapon habang nagkukuwentuhan umano ang magpinsang biktima nang biglang pumasok sa kanilang compound ang nagwawalang suspek na may dalang itak.
Tinangka nilang pakalmahin ang suspek ngunit lalong naghurumentado hanggang sa pagtatagain ang mga biktima saka agad na tumakas.
- Latest