Laklakan nauwi sa rambol sa binyagan: Ninong utas
TUGUEGARAO CITY, Cagayan, Philippines — Dahil sa sobrang kalasingan, nauwi sa rambulan ang laklakan ng magkukumpare sa isang binyagan na ikinamatay ng isang ninong sa Brgy. Agaman Norte, Baggao, Cagayan kamakalawa.
Kinilala ng pulisya ang napatay na si Jabes Cocoy, 28, isa sa mga tumayong ninong sa anak ni Rodolfo Domingo.
Pinaniniwalaang agawan sa pulutan na nauwi sa rambulan ng magkukumpare ang dapat sanang masayang inuman dakong alas-3:00 ng hapon.
Dahil sa mga nagliparang upuan at bote ay nagpulasan ang mga bisita sa takot na madamay sa gulo at nang humupa na ang tensiyon ay nakita na lamang si Cocoy na duguang nakahandusay sa lupa na may nakatarak na
kutsilyo sa dibdib.
Sinikap isugod ng mga sumaklolo ang biktima sa Baggao District Hospital pero idineklarang dead-on-arrival.
Sinabi ni PO3 Eufracio Cabang na iniisa-isa nila ngayong sinisiyasat ang iba pang kumpare at bisita sa binyagan upang matukoy ang pumatay kay Cocoy.
- Latest
