Jeep nawalan ng preno: 10 sugatan
CAVITE , Philippines — Umabot sa mahigit 10 pasahero ng isang pampasaherong jeep ang sugatan matapos na mawalan ng preno at sumalpok sa isang poste sa kahabaan ng Mangubat Avenue, Brgy. Zone 4, Dasmariñas City kamakalawa.
Walo sa mga biktima na duguan at isinugod sa pagamutan ay nakilalang sina Lyxrian Faustino, 17-anyos; lola nitong si Catherine Faustino, 60-anyos; Rossana Vasquez, 47-anyos; Reuben John Arcabal, 21; Regine Destacamento, 27; May Ann Gelito, 33; Diana Dayrit, 30, at ang baby nito na si Ma. Chelsea Sofia Dayrit, 2-taong gulang. Bahagya ring nasugatan ang driver ng jeep na nakilalang si Luciano Orquesta , 39 anyos, ng Blk F7 Lot 9, Brgy. San Nicolas 2, Dasmariñas City.
Ayon kay P/Supt Nerwin Ricohermoso, hepe ng pulisya rito, alas-11:45 ng umaga habang bumabagtas ang pampasaherong jeep na may plakang DWZ-213 sa Mangubat Avenue, Brgy. Zone 4 sakay ang may mahigit sa 10 pasahero nang hindi kumagat ang preno ng sasakyan pagsapit sa may intersection kung kaya tuluy-tuloy itong rumampa sa center island bago sumalpok sa poste na nasa gilid ng kalsada.
Malalakas na sigawan at iyakan ang naganap at nagkagulo ang mga bystander at kapwa mga driver ng mga kasabayang pampasaherong jeep na agad tumulong at tumawag ng rescue.
- Latest