Trike vs. SUV: 1 tigok, 1 kritikal
CABANATUAN CITY, Nueva Ecija , Philippines — Isa ang nasawi habang isa ang sugatan matapos sumalpok ang kanilang sinasakyang tricycle sa poste ng kuryente makaraang mabundol ng isang humahagibis na sports utility vehicle (SUV) sa kahabaan ng Circumferential Rd, Brgy. San Juan Accfa ng lungsod na ito, noong Huwebes ng gabi.
Nalagutan ng hininga habang nilalapatan ng lunas sa pagamutan ang biktimang si Rosendo Pascual Jr., 59, may-asawa, habang patuloy na inoobserbahan ang kritikal na kalagayan ng sugatang si Lerma Bunao, 51, house keeper; pawang mga residente ng naturang lugar
Nakilala naman ang drayber at may-ari ng nakabundol na Toyota Rav4 (CRM-439|) na si Romeo Casares, 30, may-asawa, isang nurse at residente ng Brgy. Bangad ng lungsod na ito.
Sa imbestigasyon, dakong alas-11:20 ng gabi, magkasalubong na binabagtas ng tricycle na minamaneho ni Pascual at ng SUV ang naturang kalsada nang bigla umanong okupahin ng SUV ang linya ng tricycle sa kalsada na nagresulta sa salpukan ng dalawang sasakyan.
Sa lakas ng salpukan ay tumilapon ang trike at bumangga pa sa isang poste ng kuryente.
Naisugod naman agad sa pagamutan ang mga biktima ngunit nasawi rin si Pascual habang ginagamot, samantalang patuloy ang obserbasyon sa malubhang kalagayan ni Bunao.
- Latest
