Bacoor drug raid: 1 utas, 10 timbog

CAVITE  , Philippines  —   Bulagta ang isang 47-anyos na lalaki na target ng operasyon makaraang umano’y manlaban sa mga awtoridad habang 10 pang drug suspect ang naaresto sa isi­nagawang pagsalakay kamakalawa ng hapon sa Brgy. Talaba 4, Bacoor City. 

Kinilala ni Police Supt Vicente Cabatingan,  hepe ng pulisya sa lungsod na ito ang napatay na suspek na si Gregorio Ugali alyas “Ube”, ng # 248 Aguinaldo Hi-way, Brgy. Talaba-4, Bacoor City at bagong gra­duate lang ng Stamp and Sipag program. 

Sa ulat, ala-1 ng hapon nang magkasamang nilusob ng Intel operatives ng Bacoor City Police at PDEA-4A ang hideout ng suspek sa Aguinaldo Highway, Brgy. Talaba-4, bitbit ang search warrant na inisyu ni Judge Agripino Morga ng RTC Fourth Judicial Region Branch 32 sa San Pablo City, Laguna, laban sa suspek.

Nang madatnan ng mga pulis si Ube sa lugar ay bigla umanong nagtatakbo sanhi ng ilang minutong habulan. Pinaputukan pa ang mga pulis na nauwi sa engkuwentro at ikinabulagta ng suspek.

Naaresto naman ang 10 pang katao na sangkot din umano sa pagtutulak ng ilegal na droga sa lugar.

Nakuha sa crime scene ang may 10 plastic sachet ng shabu at 1 cal. 9mm pistol Norinco, 1 magazine, 5 fired cartridge case ng cal. 9mm, 1 fired cartridge case ng cal. 40 at 11 plastic sachet ng shabu at mga drug paraphernalia.